Bhagava (Saffron) Rang: Aatank (Terror) ka Nishaan ya Tirange ki Shaan

by tybmmjourno

Yun toh kehne ke liye humare jhande ka bhagava rang doosron ke liye tyaag aur balidaan dene ka prateek hai lekin wahin doosri aur yahi rang kaiyon ke dil main khauf ko jaga raha hai, aur unki maut ka karan ban raha hai. Shuru se hi Bharat main Hinduo ki sankhya zada rahi hai, isliye shayad iska ka naam “Hinduo” ka “sthan”, “Hindustan” hai. Jiske chalte alpa-sankhyak (minorities) hamesha kahin na kahin khud ko asurakshit mehsus karte aaye hain. Uske upar se kuch gine-chune Hinduo ke bahubal ke karan halaat aur nazuk hote ja rahe hain.

“Bhagava Aatank” (Saffron Terror) shabd un logon ke liye upyog kiya jata hai jo sirf apne aur apne jaise aas-paas rehnewalon ko swikarte hain, aur kissi anya ko apne shetra main aane se rokne ke liye saam-daam-dand-bhed bhi apnane se nahi piche hatate. Iska aatank pehle se hi tha par sabse pehle “Bhagava Aatank” shabd ka istemal, desh ke saamne 25 August, 2010 ko Bharat ke Grehmantri, P. Chidambaram, ne kiya tha. Inn logon par kai aatankwadi hamale karne ka aarop hai jaise Malegaon dhamaka (2006), Hyderabad Mecca masjid dhamaka (2007), Samjhauta Express dhamaka aur Ajmer Sharif dargaah dhamaka (2007). In “aatankwadiyon” ka ek hi irada hota hai ki ek Hindu ki jaan ke badale 10 Musalmaano ko mara jaye. 2006-07 main Bhagava Aatank apni charam par tha aur police bhi iss par kaabu pane main nakamyab dikai de rahi thi. Hairani ki baat toh ye thi ki aam janta ke dimaag main ye tuch baatein bharnewale koi aur nahi unke beech se nikale hue hi log the, phir chahe woh Gorakhpur, U.P, main Bhartiya Janta Party (BJP) ke Yogi Aditiya Nath ho ya Swami Aseemanand ya Abhinav Bharat ho.

Iss tarah ki ladai ladne wale log isse danga nahi Hindutva ki ladai kehte hain. Unke anusar Bharat desh ko Hinduo ka desh banana chhaiye aur alpa-sankhyako ke saare adhikaar cheen lene chhaiye. Inn logo ka toh yahan tak maanana hai ki desh main Hinduyon ka senyakaran hona chhaiye. Hinduo ko sena mein bharti karke unhe yudh ke liye taiyar karna chahiye. Par ek sawal jo mere jehen main uthta hai woh ye hai ki Hindutva ko chahane wale ye kattarwadi log, Hinduo ki sena banana chahte hain, unhe yudh ke liye taiyar karna chahte hain lekin woh ye jung kiske viruddh ladh rahe hian? Kiske khilaf woh ye sena chahte hain- samaj ke, alpa-sankhyak logon ke, khud ke, aakir kiske khilaf? Aur iss tarah masoomo ka khoon bahane aur aatank machane se aakhir unhe aisa kya hasil ho jayega jo shanti se baat karne par nahi milega?

Ye kattarwadi hindu Musalmaano par ilzam lagate hain ki woh apne bachho ko bachpan se hi Hinduo ke khilaf bhadkate hain, ye Hinduo ke ma-beheno ke saath durvyawhar karte hain. Hindustan main rehne ke baawjood Hinduo ke prati nafrat karna sikhate hain. Par main unse kehna chhahti hun ki woh apne andar jhank kar dekhe aur puche apne aapse, kya woh kuch alag kar rahe hain? Agar unhe lagata hai Musalmaan apne bachho main nafrat ki aag bhadka rahe hain toh kya woh apne bachho main Musalmaano ke khilaf ghrina aur nafarat ke beej nahi bo rahe hain? Agar woh doosron ki ma-behen ki izzat nahi karenge toh unki ma-behno ki izzat koi kyun karega? Bachhe jinhe hum desh ka bhavishya kehte hain, unke khud ke bhavishya ka koi ata-pata nahi hai. Unhe bachpan se sikhaya jata hai, hum Hindu hain, hum brahman hain, hum uche hain, hume Musalmaano se dur rehna chahiye, aadi. Jo khud ghrina ki ek khatarnak jung ladh rahe hain woh kaise kisi desh ke bhavishya ko nikhar sakte hain?

Ek baat jo ab hume samajhni padegi woh ye ki jitna hum Lashkar-e-Taiba ko tavajjo dete hain, kyunki hume lagta hai LeT se humare desh ko khatara hai, utna hi hume iss Bhagva Aaatank ko tavajjo deni hogi kyunki isse hume aur zada khatara hai.

Jis tarah se Bhagava Aatankwad badhta ja raha hai, Bharat main khatare ki ghanti baj rahi hai aur hume isse nipatne ke liye thos kadam uthane padenge. Ek baat hume hamesha yaad rakhni hogi aatank ka koi majhab nahi hota. Aur aatank ko kissi rang se joda nhi jana chahiye, fir chahe woh rang Bhagva ho ya Hara.

Advertisements